Mabwysiadu a’ch busnes
Gwybodaeth i gyflogwyr
Mae yna lawer o ffyrdd i gefnogi mabwysiadu yn eich busnes, ac nid oes rhaid iddo fod yn ddrud na chymryd llawer o amser. Mewn gwirionedd, gall helpu eich busnes i dyfu trwy ddenu a chadw’r dalent orau bosibl.
Beth sy’n gwneud busnes yn gyfeillgar tuag at fabwysiadu?
Mae mynd drwy’r broses fabwysiadu yn gofyn am ymrwymiad, amser, ffocws, ac yn bwysicaf oll, cefnogaeth gan deulu, ffrindiau a chyflogwyr.
Dyma rai enghreifftiau o arfer gorau ac os ydych yn gwneud rhai neu bob un o’r rhain, yna byddem yn eich ystyried yn fusnes sy’n ystyriol o fabwysiadu.
Polisïau rhianta cyfartal sy’n amlinellu’n glir y cymorth i rieni sy’n mabwysiadu a’r rhai sy’n mynd drwy’r broses fabwysiadu.
Polisi mabwysiadu sy’n cynnwys amser i ffwrdd ar gyfer hyfforddiant, asesu, paneli a chyflwyniadau.
Polisi mabwysiadu sy’n cynnwys cymorth i rieni pan nad yw’r mabwysiadu’n llwyddiannus, sy’n debyg i’r cymorth a ddarperir i’r rhai sy’n profi camesgoriad.
Polisi mabwysiadu sy’n caniatáu hyblygrwydd ychwanegol ar ôl lleoli ac sy’n cydnabod y gall magu plant sydd wedi cael dechrau anodd mewn bywyd fod yn fwy beichus i rieni ac felly efallai y bydd angen mwy o amser.
Cysylltwch â ni i gael eich bathodyn busnes sy’n ystyriol o fabwysiadu.
Pecyn cymorth mabwysiadu a’ch busnes
Er mwyn cynorthwyo busnesau i ddarparu’r cymorth priodol i’w gweithwyr, rydym wedi datblygu pecyn cymorth cyflogwr. Mae’r canllaw rhad ac am ddim hwn yn grymuso cyflogwyr i gynorthwyo darpar fabwysiadwyr a mabwysiadwyr cymeradwy, o fewn a thu hwnt i’w busnes.
Mae ein pecyn cymorth yn rhoi cyfeiriad a chymorth, gan gynnwys gwybodaeth ar y canlynol:
- Cefnogi mabwysiadu yn eich gweithle
- Absenoldeb rhiant i rieni sy’n mabwysiadu
- Dangos eich cefnogaeth i fabwysiadu ar-lein
- Helpu rhieni newydd
- Trafod mabwysiadu gyda’ch cyflogeion
Ymunwch â ni i sicrhau triniaeth deg i rieni mabwysiadol yn y gweithle.
Lawrlwythwch y pecyn cymorth mabwysiadu a’ch busnes.
