Blog

Roedd ein ‘Diwrnod Gweithgareddau Mabwysiadu’ diweddar, Amser Gwanwyn ar y Fferm, yn achlysur gwirioneddol arbennig, gan ddod â phlant a darpar fabwysiadwyr o bob cwr o Gymru ynghyd mewn amgylchedd cynnes, croesawgar a llawn hwyl.

Roeddem yn falch iawn o groesawu 34 o blant, rhwng dim ond 9 mis a 7 oed, gan gynnwys pum grŵp o frodyr a chwiorydd, ynghyd â gofalwyr maeth, gweithwyr cymdeithasol, canfyddwyr teuluoedd, cydweithwyr o CoramBAAF a staff y Gwasanaeth Mabwysiadu Cenedlaethol. Croesawyd hefyd 13 o ddarpar fabwysiadwyr, gan gynnwys cyplau ac unigolion, pob un yn gobeithio cymryd y cam nesaf ar eu taith fabwysiadu.

Cafodd y lleoliad ei drawsnewid yn fferm wanwyn fywiog, yn llawn lliw a gweithgaredd. Mwynhaodd y plant amrywiaeth eang o brofiadau gan gynnwys ystafelloedd synhwyraidd, chwarae meddal, sw bach anwesu, paentio wynebau, tatŵau gliter, gemau chwaraeon, plannu hadau, hambyrddau synhwyraidd a theganau STEM. Gyda gorsafoedd byrbrydau a diodydd ar gael drwy gydol y dydd, ac adloniant gan Lizz Fizz, roedd yna ymdeimlad gwirioneddol o hwyl ac egni drwy’r digwyddiad.

Y tu hwnt i’r gweithgareddau, yr hyn a wnaeth y diwrnod mor ystyrlon oedd y cysylltiadau oedd yn cael eu ffurfio. Fel y nododd Hannah Jones, Rheolwr y Gofrestr Fabwysiadu:

“Mae Diwrnodau Gweithgareddau Mabwysiadu wedi dod yn ddull sefydledig o baru plant sy’n aros i gael eu mabwysiadu. Mae’r digwyddiadau hyn yn cynnig cyfle unigryw i ddarpar fabwysiadwyr gwrdd â phlant mewn amgylchedd hwyliog, hamddenol a chefnogol.”

Adlewyrchwyd hyn gan y rhai a oedd yn bresennol. Dywedodd un darpar fabwysiadwr:

“Roeddwn i’n nerfus i ddechrau. Fodd bynnag, cefais fy rhoi’n gysurus – roedd digon o staff i ofyn cwestiynau iddynt ac roedden nhw’n gymorth enfawr. Roedd y digwyddiad wedi’i drefnu’n dda, yn eang ei le ac roedd digon i’w wneud.”

I lawer, mae effaith y diwrnod yn ymestyn ymhell y tu hwnt i’r digwyddiad ei hun. Myfyriodd un gweithiwr cymdeithasol ar sut mae’r profiadau hyn yn helpu mabwysiadwyr i symud ymlaen gyda mwy o hyder:

“I un cwpl, helpodd gadarnhau eu meddyliau am blentyn penodol ac maent bellach yn symud ymlaen gyda’r cysylltiad hwnnw. Mae cwpl arall, nad ydynt eto wedi’u cymeradwyo, wedi gweld yn hynod ddefnyddiol bod ymhlith gwahanol ystodau oedran a siarad â gofalwyr maeth – mae wedi’u helpu i ganolbwyntio ar yr ystod oedran y maent yn gobeithio ei mabwysiadu.”

Adlewyrchwyd hyn yn ehangach gan weithwyr proffesiynol sy’n cefnogi mabwysiadwyr:

“Rwyf wedi sylwi ar wahaniaeth amlwg ymhlith y rhai sydd wedi gallu mynychu diwrnod gweithgaredd, o’i gymharu â’r rhai nad ydynt. Maent wedi bod yn llawer mwy agored i archwilio cysylltiadau ar ôl cyfarfod â’r plant.”

Cafodd y mynychwyr hefyd gyfle i adael sylwadau am y plant y wnaethon nhw gwrdd, gan gyfrannu at eu gwaith stori bywyd – rhan bwysig o helpu plant i ddeall eu profiadau a’u hunaniaeth.

Cafodd y diwrnod ei ganmol hefyd am ei gynllunio ystyriol a’i awyrgylch:

“Roedd yn ddigwyddiad wedi’i drefnu’n dda iawn – mwynhaodd y plant ac roedd yn cynnig awyrgylch hamddenol i ofalwyr maeth a mabwysiadwyr, gyda digon o weithgareddau i’w mwynhau.”

Rydym yn hynod ddiolchgar i bawb a helpodd i wneud y diwrnod yn bosibl. Yn bwysicaf oll, gobeithiwn fod y plant wedi gadael gyda chofion hapus a dechreuadau cysylltiadau a allai helpu i lunio eu dyfodol.